हुन त नेपालीहरु विक्रम संवतलाई नयाँ वर्षको रुपमा मनाउँछन् । तर
पछिल्लो समय भित्रिएको पाश्चत्य शैलीका कारणले पनि हुनसक्छ, नेपालीहरुको
घरघरमा पनि इस्वी संवत अर्थात अंग्रेजी नयाँ वर्षलाई धुमधामका साथ मनाउन
थालिएको छ । यसैले पनि होला नयाँ वर्षको आगमन सगँसँगै नेपालीहरुलाई पनि
यसको रौनकले छोईसकेको छ । झन नयाँ वर्षको उत्सवमा त कलाकारलाई यसको रौनकले
नछुने कुरा नै भएन ।
नेपाली सिने क्षेत्रका कलाकारहरु पनि नयाँ वर्षलाई आआफ्नै तरीकाबाट
मनाउने तयारी गर्दैछन् । आखिर अंग्रेजी नयाँ वर्षलाई नेपाली कलाकारले कसरी
मनाउँदैछन् त ? कुरा थाहा पाऔं उनीहरुकै भनाईबाट ।
केकी अधिकारी
यसपटक
मेरो नयाँ वर्ष दुई तरीबाट बित्दैछ । नयाँ वर्षको अघिल्लो दिन अर्थात
डिसेम्वरको अन्तिममा ‘आई एम सरी’को युनिटसँग मनकामना जाँदैछु । चलचित्र
चल्न लागेकाले सिनेमाको भाकल गर्नका लागि जाने कुरा भएको छ । यसैले नयाँ
वर्षको दिन मनकामना हुनेछु । त्यसपछि भने पूरा समय परिवारलाई दिने सोचाईमा
छु । हाम्रो परिवारमा पहिलादेखि नै नयाँ वर्ष मनाउने चलन छ । यसैले पनि म
दिनभर परिवारसँगै नै हुन्छु । घरमा ईष्टमित्रहरु आउनुहुन्छ । उहाँहरुसँग
रमाईलो गरेर, मिठा परिकार बनाएर खाँदै नयाँ वर्ष मनाउने सोचमा छु म ।
ऋचा घिमिरे
मेरो
यसपटकको नयाँ वर्ष निकै उत्साहजन तवरबाट बित्नेछ । यो नयाँ वर्षको दिनमा म
घरमै हुनेछु । किनकी नयाँ वर्षमा जे जे गर्यो वर्षभरी नै त्यही गरिने
भएकाले पनि घरमा बसेर नयाँ नयाँ काम सिक्ने योजनामा छु । तर न्यू ईयर ईभमा
भने मजाले नाच्ने योजनामा छु । अष्ट्रेलियाका केही साथीहरुले चाबहिलमा
रेष्टुरेण्ट खोलेका छन् । यसपटक पूरा परिवार र साथीभाइको साथमा सोही
रेष्टुरेण्टमा गएर धित खोलेर नाच्ने योजनामा छु । यसका लागि हामीले
डिजेहरुको व्यवस्था समेत गरिसकेका छौं । यसैले नयाँ वर्षको अघिल्लो दिन
रेष्टुरेन्टमा गएर नाचिन्छ र नयाँ वर्षको दिन घरमै बिताउने योजना छ । म
अंग्रेजी होस् या नेपाली नयाँ वर्ष निकै खुलेर मनाउने गर्दछु । किनकी, कुनै
पनि राम्रा अवसर म गुमाउन चाहन्न ।
गरीमा पन्त
यो
वर्षको नयाँ वर्ष मेरो नेपाल बाहिर बित्नेछ । यो वर्ष म एक साँकृतिक
कार्यक्रमका लागि कतार जाँदैछु । यसैले यो वर्षको नयाँ वर्ष बिदेशमा रहनु
भएका नेपालीहरुलाई रमाईलो गराएर नै बित्नेछ । डिसेम्वर २९ या ३० मा म सहित ६
जना कलाकारको टोली त्यसतर्फ लाग्नेछ । हाम्रो नयाँ वर्षको दिन त्यहाँ
कार्यक्रम भएकाले पनि हामी उतै रमाईलो गर्ने मुडमा छौं । ५ दिने सांकृतिक
कार्यक्रम भएकाले उतै घुमघाम गर्ने र रमाईलो गर्ने मुडमा छु म । तर,
नेपालमा हुने बिभिन्न कार्यक्रमलाई भने धेरै नै मिस गर्नेछु मैले ।
आयुष रिजाल
म
अंग्रेजी महिना मनाउँदिन । कारण हामी नेपालीहरुको नयाँ वर्ष भनेको बिक्रम
संवत हो । यसैले, म बिक्रम संवतको नै प्रतिक्षामा छु । नयाँ वर्ष हाम्रो
चाड नभएकाले पनि यसप्रति मेरो कुनै उत्साह छैन । तर शुभकामना आदानप्रदान
तथा साथीभाइसँगको भेटघाट त भैहाल्छ नै । तर, पनि नयाँ वर्षका लागि मैले
खासै केही कार्यक्रम बनाएको भने छैन । सायद, यो दिनमा पनि म सुटिङमा नै
व्यस्त हुन्छु होला ।
श्रीकृष्ण श्रेष्ठ
नयाँ
वर्ष म अंग्रेजीलाई मान्दिन । कारण, हामी नेपालीहरुले मान्दै आएको र
हाम्रो नयाँ वर्ष भनेको बिक्रम संवत हो, जुन हामी वैशाख १ लाई मनाउँछौ ।
यसैले म यो अंग्रेजी नयाँ वर्षमा कुनै त्यस्तो कार्यक्रम बनाएर बसेको छैन ।
तर, अंग्रेजी नयाँ वर्षबाट म एउटा कामको थालनी गर्दैछु । जसको उद्घाटन
भने नेपाली नयाँ वर्षमा गराउने मेरो योजना छ । अब, म मेरो नयाँ व्यवसायको
तयारीमा रहनेछु ।
