बधाई छ, सुयसा रानालाई जो नेपालमाथि बन्न लागेको अमेरिकी सिनेमा ‘हाइवे टु धम्पुस’मा अनुबन्धित भएकी छिन् । अष्ट्रेलियामा अभिनयको औपचारिक अध्ययन गरिरहेकी सुयसाले सिनेमामा लक्ष्मी पात्रको भूमिकामा अभिनय गर्नेछिन् । प्रोजेक्टका नेपाली निर्माता जसवन्तदेव श्रेष्ठले नेपाल उड्नुको एकदिन अघि अमेरिकाबाट मेरोसिनेमासँग भने, ‘मिहेनत र नयाँ काम गर्न रुचि देखाउने सुयसा प्रोजेक्टमा नेपालकी लिड एक्ट्रेस हुनेछिन् ।’अपोजिटमा हुनेछन् अभिनेता राजवल्लभ कोइराला जो यसअघि अडिसनबाट सेलेक्ट भैसकेका छन् । सुयसाले विभिन्न अन्तराष्ट्रिय इन्स्टिच्युटहरूबाट कलाकारिताको तालिम पनि लिइसकेकी छिन् । निर्माता श्रेष्ठका अनुसार नेपालबाट बाँकी पाँचवटा भूमिकाका लागि केही सातामा अडिसन सुरु हुनेछ । आफ्नो टोलीसहित श्रेष्ठ डिसेम्बर अन्त्यमा लोकेसन हन्टिङ र अडिसनका लागि काठमाडौं आउँदैछन् । सोसल लाइट ड्रामा श्रेणीको सिनेमाको सुटिङ फेव्रुअरी पहिलो साताबाट सुरु हुनेछ ।
फिप्टी प्रोडक्सनले निर्माण गर्ने प्रोजेक्टलाई रिक म्याक फारल्यान्डले निर्देशन गर्नेछन् । श्रेष्ठले यस सिनेमालाई इन्डिपेन्डेन्ट सिनेमा भएको बताए । नेपालका रमणीय ठाउँहरूमा सिनेमा छायांकन हुनेछ । बाँकी नेपाली अभिनेत्रीहरूका लागि यसअघि माल्भिका सुब्बा र केकी अधिकारीले बायोडाटा बुझाएको खबर आएको थियो ।
