जनकपुर, पुस १४- स्वाथ्य तथा जनसङ्ख्यामन्त्री राजेन्द्र महतोले सेनामा मधेसीको भर्नासम्बन्धमा सर्वोच्च अदालतले गरेको फैसला मधेस र मधेसीविरुद्ध भएको आरोप लगाएका छन्। सरकारसँग भएको चारबुँदै सहमतिअन्तर्गत सेनामा मधेसी भर्ना गर्नेबारेमा भएको सहमतिलाई बेवास्ता गरी अदालतले गलत फैसला गरेको मन्त्री महतोको आरोप थियो।
जनकपुरस्थित मोनास्टिक आवासीय उच्च माध्यामिक विद्यालयको रजत जयन्ती समारोहलाई बिहीबार सम्बोधन गर्दै मन्त्री महतोले अदालतले राजनीतिक फैसला गरेको हो टिप्पणी गरे।
उनले आफ्नो हक र अधिकारको लडाइँ अन्तिम चरणमा पुगेको बताउँदै चारबुँदे सहमति पूरा नभए नाकाबन्दी गरी काठमाडौंको दानापानी रोकिदिने चेतावनी दिए।
उनले शान्ति प्रक्रिया पूरा भएपछि नेपाली कांग्रेसको नेतृत्वमा नयाँ सरकार बन्ने र संविधान लेखन कार्य पूरा भएपछि देश ताजा जनादेशमा जानेछ भने।
