चलचित्र विकास बोर्डले सिनेमा संकटकाल घोषणाको तयारी गरेको छ । नेपाली सिनेमाको लगानी घाटा दुई तिहाइको नजिक पुग्न थालेपछि विहिबार बोर्डको आपतकालिन बैठक बसेको थियो । बोर्डका सल्लाहकारहरूले संकटकाल घोषण गर्न सुझाएलगत्तै बोर्ड अबको दुईतीन सातामा घोषणा गर्ने मनस्थितीमा छ । यसका लागि बहस चलाउने र घोषणाका प्रभाव र आधारहरू तय गर्न सम्वद्ध २१ संघसंस्थाहरूको छलफलमा प्रतिवेदन तयार हुनेछ ।‘नेपाली सिनेमाको अस्तित्वको प्रश्न उठेपछि संकटकाल घोषणको विकल्प रहेन’ बैठकपछि वोर्ड प्रवक्ता विजय वस्नेतले मेरोसिनेमासँग भने, ‘यसका लागि सरोकार निकायसँगको सहमतिमा बहस सुरु गर्ने र प्रतिवेदन तयार पार्ने काम हुनेछ ।’ संकटकाल घोषणापछि तीन कुरा हुनेछन् –पहिलो, सरकारले आपतकालिन राहतका प्याकेज अघि सार्नेछ । दोस्रो– बजार संरचनामा बोर्डले प्रत्यक्ष हस्तक्षेप गर्नसक्छ र तेस्रो– क्षमता र दक्ष निकायलाई लगानीका लागि आह्वान हुनेछ ।
संकटकाल घोषणाका पाँच आधारहरू पनि बोर्डले तयार गरेको छ । पहिलो– वर्ष २०११ मा नेपाली सिनेमाको लगानी घाटा ६५ प्रतिशत पुग्नु । दोस्रो– मागको तुलनामा निर्माण बढी । तेस्रो –वितरण प्रणालीमा विचौलिया (तेस्रो व्यक्ति)को उपस्थिती, चौंथो –भौतिक पूर्वाधारमा समायानुकूल स्तरोन्नती नहुनु र पाँचौं –नेपाली सिनेमाले देशभित्रै पहिचान बनाउन नसक्नु । प्रवक्ता बस्नेतले संकटकाल घोषणाले सिनेमा क्षेत्रलाई सांस्कृतिक उद्योगको मान्यता दिलाउन कुनै असर नपर्ने बताए । ‘सिनेमा नै नरहने हो भने सांस्कृतिक उद्योग किन चाहियो ?’ बस्नेतले भने ।
