‘थ्री लवर्ज’ विवादबारे मेरोसिनेमालाई प्राप्त टेपरेकर्डले थप तथ्यहरूको खुलासा गरेको छ । जहाँ हिरोइन निशा अधिकारीलाई सिनेमाबाट निष्कासन गरेको नभई उनी आफै स्वेच्छाले निस्किएको उल्लेख छ । उक्त रेकर्डका अनुसार निशामाथि लागेका चार आरोपहरूको खण्डन गरिएको छ । पहिलो –उनले स्वेच्छाले सिनेमा छाडेकी हुन् । दोस्रो –अर्को प्रोजेक्टसँग सेड्युल जुधाएकी होइनन । तेस्रो –आइटम नम्बर बिरामी भएर आफै गर्न नसकेकी हुन् र चौंथो –पैसा लिन डाक्दा पनि निर्माण पक्ष नगएका हुन् ।अग्रिमेन्ट अनुसारको पैसा फिर्ता नगरेको भन्दै निर्देशक सुरेशदर्पण पोखरेलले निशाविरुद्ध निर्माता संघमा उजुरी दिएका थिए । निशाले यसअघि ‘थ्री लवर्ज’मा साइन गरेकी थिइन् । उनी आफैले सिनेमा छाडेपछि अर्की अभिनेत्री प्रियंका कार्कीले निशालाई रिप्लेस गरेकी थिइन् । रेकर्डका अनुसार प्रियंकालाई उक्त प्रोजेक्टमा एप्रोचका लागि स्वयम निशाले नै सघाएकी थिइन् ।
मंसिर १३ र १४ गते तय गरिएको आइटम नम्बर आफू विरामी भएपछि गर्न नसकेको निशाले बोलेकी छिन् । पैसा माग्दै एकपटक निर्देशक पोखरेलले एसएमएस गरेको र पैसा लिन डाक्दा पनि नआएको कुरा रेकर्डमा उल्लेख छ । निर्माता संघमा गरिएको उक्त संवाद रेकर्डमा निशाले आरोपहरूको खण्डन गरेकी छिन् । जहाँ उनले आफू गैरब्यावसायिक नभएको पनि बताएकी छिन् । निशा यतिबेला सिमोस सुनुवार निर्देशित ‘मिसन पैसा रिलोडेड’मा व्यस्त छिन् ।
